Nina uhakika utakuwa ulishawahi kuota ndoto mbaya au ulishawahi kusikia mtu akisema ameota ndoto mbaya, iwe ni ya kufukuzwa, kupoteza meno, au kujikuta uchi hadharani na ukawa unajiuliza nini maana ya ndoto hizo.
Sasa Wataalamu wanasema kwamba ndoto za kutisha zinaonesha mwelekeo wa tabia ya wanadamu na zinahusishwa na uzoefu wa kibinafsi wa maisha ya kila siku.
Hivyo uotaji wa ndoto kama hizo hutoa ufahamu katika akili na hisia za muhusika, ingawa tafsiri ndoto mbaya si sayansi kamili, kwa kuwa kuelewa mada za kawaida kunaweza kutoa mwanga kwanini mtu hupitia hali hizi za kutisha.
Kwa kila usiku, kwa kawaida huwa kuna vipindi vitano vya ndoto, vinavyochukua kati ya dakika 15 na 40, ambayo ina maana kwamba tunatumia takriban saa mbili kuota.
Kukiwa na watu bilioni 8 Duniani, hiyo inaongeza hadi takribani ndoto bilioni 35 kila siku, ingawa ndoto nyingi ni za kufikirika au zimesahaulika, na hivyo kufanya mada za kawaida huibuka.
Hata hivyo, Wataalamu wanasema ndoto za kutisha ni tukio zima ambalo mara nyingi huonesha hofu na wasiwasi wa kina, ingawa inaweza kutofautiana sana kati ya mtu hadi mtu, kwani matukio kadhaa ya kawaida na maono, yapo katika ndoto za watu wengi kama ambavyo wao wanatafsiri maana husika hapa chini kulingana na ndoto ya mtu hasa zile za mara kwa mara.
1. Meno kudondoka
Ndoto kuhusu meno yako kuanguka, inaweza kuonyesha wasiwasi wako kuhusu mwonekano wako na jinsi wengine wanavyokuona.
Ndoto kama hizo zinaweza kutokea kwa sababu ya hofu ya kukataliwa, aibu au hisia zisizovutia na Meno yanapotumika kuuma, kurarua, na kutafuna basi ndoto hii inaweza kutokea kwasababu ya hali ya kutokuwa na nguvu, ambayo inamaanisha unaweza kuwa unakabiliwa na masuala ya kujiamini kupita kiasi.
2. Kuandamwa na jinamizi
Kufukuzwa katika ndoto kunaonesha kuwa unakimbia kitu na kusababisha hofu au wasiwasi katika maisha ya kiutafutaji kwa maana ya riziki zako za kila siku.
Inaonesha kwamba huwa unakimbia au kuepuka suala fulani, hivyo mkimbizaji pia anaweza kuwakilisha sehemu yake mwenyewe kwa mfano, hisia za hasira, wivu au woga na zinaweza kudhihirika kama kielelezo cha kutisha.
3. Kutoweza kupata choo
Kuwa na shida kupata choo inamaanisha unaweza kupata ugumu kuelezea mahitaji yako katika hali fulani. Hii inaweza kuwakilisha hisia za mahitaji yako ya kibinafsi na kutotimizwa kwa yale uliyoyapangilia kuyatekeleza.
Unaweza kuhisi kwamba unakosa muda wa masuala ya kibinafsi na unahitaji faragha zaidi, kujitunza au kujieleza na hapo ndipo huja hisia kama hizo zinazopelekea muhusika kupata ndoto za namna hiyo.
4. Kuwa mtupu hadharani
Ndoto ya kuwa uchi katika ndoto, inaashiria kutoweza kujikuta au kutokuwa na uhakika wa jambo fulani au pia inaweza kuwakilisha kuabika vibaya.
Kuwa uchi hadharani kunaonyesha hisia za hatari na hofu ya kutokubalika kwako na umati, hivyo ukipata ndoto kama hii unatakiwa kuwa mwangalifu na mambo yako ya kila siku ili usijikute matatani.
Ikiwa wewe umeota hupo uchi katika ndoto yako lakini unaona mtu aliye uchi na unasumbuliwa na hilo, ina maana una wasiwasi juu ya kumfichua mtu huyo kwa kile anachokificha ambacho ni cha aibu na jamii ikijua itamtoa maana.
5. Mtihani shuleni
Ndoto za mitihani zinaweza kuwa halisi kwamba tunaamka tukiwa na hakika ya kuwa tulifeli mtihani muhimu na mara nyingi yanahusiana na mkazo wetu wakati wa elimu yetu hata miaka baadaye.
Wanaweza kumaanisha kuwa unajiweka chini ya shinikizo kubwa la kufanya vizuri au kuhisi kama unarudi nyuma kimaendeleo au kimaisha lakini ikiwa hii ni kweli au la, basi huwa ni ishara tu ya kutekeleza utaratibu wa kufurahi usingizi bora.
6. Kuruka au kupaa
Wakati mgumu wa kupaa katika ndoto zako unaonyesha kwamba mtu (au kitu) ana/kinakuzuia kuhamia hatua inayofuata maishani.
Lakini kuogopa kuruka kunahisiwa kwamba unaweza kuwa na shida ya kufuata malengo ya juu uliyojiwekea. Hata hivyo, ikiwa uko peke yako na unajitahidi kuruka lakini unashindwa, hiyo ina maana kwamba hujiamini.
7. Kuanguka
Imeunganishwa kwa karibu na hiyo ndoto ya kuruka kwa maana kwamba, ikiwa utaanguka katika ndoto yako na kushindwa na hofu, inaashiria kutokuwa na usalama na wasiwasi juu ya hali.
Lakini kinyume chake, humaanisha kuwa hauogopi mabadiliko.
8. Jinamizi la Magari
Ndoto za magari na njia nyingine za usafiri zinaweza kuwakilisha wakati wa mabadiliko katika maisha yako na kutafakari ikiwa unahisi udhibiti wa mwelekeo wako.
Kwa hiyo, ndoto mbaya kuhusu magari yasiyo ya udhibiti au ajali za gari kwa kawaida huonesha kwamba una wasiwasi kuhusu unakoelekea au kuna mtu mwingine anakufanyia maamuzi muhimu ya ubaya, yaani anaharibu mambo yako.
9. Kunaswa au kupotea
Ndoto nyingine ya kawaida ni kuota umepotea au umefungwa mahali fulani, iwe katika msitu, jiji ambalo haujui, lifti, au popote pale.
Kama wasiwasi wa kawaida ambao sote tumepitia, haishangazi kwamba pia huibuka kwa ndoto kama hii ambayo huleta wasiwasi na hofu.
Ndoto hizi za jinamizi zinaweza kuonesha hisia kuhusu maisha yako – labda unatafuta mwongozo au unataka mabadiliko, lakini husababisha mfadhaiko na wasiwasi.
10. Kuchelewa
Kuota kwamba umechelewa daima ni uzoefu wa kusisitiza yaani inaweza kumaanisha kuwa unahisi kama uko nyuma au muda unaisha hasa kwa mabadiliko muhimu ya maisha.
Kuota kuwa umechelewa pia ni jinamizi lililoenea kwa wengi kwa hivyo jaribu kupunguza wasiwasi kabla ya kwenda kulala, na jitahidi kulala ukiwa na furaha.
Swali. Je, Ndoto mbaya zinahusishwa na hali ya afya ya akili?
Ndoto mbaya hazioneshi hali ya afya ya akili kila wakati, kwani utafiti unaonesha kwamba asilimia 70 ya watu walio na matatizo ya kisaikolojia na ugonjwa mkubwa wa huzuni hupata jinamizi sugu, linaloonesha uhusiano mkubwa kati ya dhiki ya akili na ndoto mbaya.
Sababu zingine nyingi pia zinaweza kuchangia ndoto mbaya. Kunywa pombe na hata kula dakika chache kabla ya kulala kunaweza leta matukio ya kutisha tuliyonayo wakati wa usingizi na wakati mwingine, inaweza tu kuwa filamu ya kutisha uliyotazama ikibaki kwenye kumbukumbu yako hivyo inakusumbua usingizini wakati ubongo ukijituliza.
