Mshambuliaji Atupele Green Jackson amejiunga na wawakilishi wa Tanzania kwenye michuano ya Kombe la Shirikisho Barani Afrika ‘CAF’ Biashara United Mara.
Atupele amejiunga na klabu hiyo akitokea Geita Gold FC iliyopanda daraja kutoka Ligi Daraja la Kwanza hadi Ligi Kuu Tanzania Bara.
Usajili wa Mshambuliaji huyo ni dhamira ya Uongozi wa Biashara United ya kukifanyia maboresho kikosi chao kuelekea msimu ujao wa Ligi Kuu Tanzania Bara na michuano ya kimataifa (Kombe la Shirikisho).
Mbali na Atupele klabu hiyo pia imefanikiwa kupata saini ya Mshambuliaji Alias Maguli, baada ya kuachwa na klabu ya FC Platnums ya Zimbabwe.
Klabu ya Biashara United ilikua kimya kwa muda wa majuma kadhaa katika suala la usajili, jambo ambalo lilizua taharuki kwa wadau wa soka nchini, kufuatia muda wa usajili wa kimataifa kutarajiwa kufikia kikomo Agosti 15.
