Msanii wa muziki wa Hip Hop Mtanzania Yeyo ‘the miracle kid’ ametajwa kama mshindi wa mzunguko wa pili wa shindano maarufu ‘Back The Mic’ lililohusisha wasanii kutoka nchi kumi za Afrika.
Yeyo ameibuka na ushindi ulimuweka kwenye nafasi nzuri kimuziki ikiwa ni pamoja na kupatiwa zawadi kiasi cha pesa kisichopungua Usd 25,000 ambazo ni sawa na Tsh Milioni 58.
Licha ya Tanzania kuwakilishwa vyema na rapa Yeyo mataifa mengine yaliyoingiza washiriki kwenye shindano hilo ni pamoja Nigeria, Rwanda, Kenya, Ethiopia, Afrika Kusini na Senegal.
Ushindi wa Yeyo umekuja kufuatia ushiriki wa mashabiki kuchagua mshindi kwa kutumia mfumo wa kupiga kura kupitia App iitwayo ‘Take Back The Mic’. Utaratibu ukiwa kila nchi ilikuwa na washiriki watatu, Tanzania ikiwakilishwa na Yeyo Leon pamoja na Fresh like Uuhh.
Yeyo amebainisha wazi kuwa ushindi wake huo anauelekeza kwa mama yake mzazi marehemu Rosemarie Allan, aliyefariki mapema mwezi wa kwanza mwaka 2021 pamoja na dada yake aitwaye Debra ambaye aliyefariki karibu miaka mitano iliyopita.
“Tanzania we won the ‘take back the mic’ title for 2021,” aliandika kwenye ukurasa wake wa mtandao wa Instagram.
