Kiungo Mshambuliaji wa Mabingwa wa Soka Tanzania Bara Simba SC Peter Banda anatarajiwa kuondoka Tanzania kuelekea Saudi Arabia kujiunga na kikosi cha timu ya Taifa ya Malawi ‘The Flames’ kuelekea Fainali za Mataifa ya Afrika ‘AFCON 2021’ zitakazounguruma nchini Cameroon mwezi Januari.
‘The Flames’ imeweka kambi Saudi Arabia kwa ajili ya kujiandaa na Fainali hizo, huku baadhi ya wachezaji walioitwa kwenye kikosi tayari wameshaondoka Malawi.
Shirikisho la Soka la Malawi limetuma Barua Pepe kwa uongozi wa Simba SC ya kuomba umruhusu kiungo huyo kujiunga na kambi yao ya Saudi Arabia.
Banda bado yupo nchini ambapo Ijumaa (Desemba 24) alikuwa katika kikosi cha timu mkoani Tabora kilichocheza mchezo wa Ligi Kuu Bara dhidi ya KMC FC.
Kaimu Afisa Habari wa Simba SC, Ally Shatry amesema: “Tumepokea barua ya kumruhusu Banda kwenda kujiunga na kambi ya timu ya taifa ya Malawi, hivyo haraka tutamruhusu kwa ajili ya kujiunga na kikosi hicho.”
Kwenye Fainali za ‘AFCON 2021’, Malawi imepangwa Kundi B na timu za mataifa ya Guinea, Senegal na Zimbabwe.
