Mwandishi wa Habari na mpiga picha, Joachim Kapembe (45), amefariki dunia wakati alipokuwa akishuka kutoka katika kilele cha Mlima Kilimanjaro.
Kapembe, alikuwa akishuka mlima huo akiwa na watendaji wa Wizara ya Habari, Mawasiliano na Teknolojia ya Habari, waliopanda mlima huo Desemba 9, 2022 wakizindua intaneti ya mwendokasi ya Shirika la Mawasiliano Tanzania (TTCL).
Joachim Kapembe, alikuwa ni mpiga picha wa Shirika la Utangazaji Tanzania (TBC), mkoani Manyara ambaye alizaliwa Februari 26, 1977 Wilaya ya Muheza Mkoani Tanga.
Hadi anafariki Desemba 13, 2022, alikuwa na cheo cha mpiga picha mkuu daraja la I na aliajiriwa na TBC Oktoba Mosi, 2011 akipewa wadhifa wa mpiga picha daraja la II na ameacha mke na watoto wawili.
