Wadhamini wakuu wa Klabu ya Simba SC Kampuni ya M-Bet imeikabidhi klabu hiyo Shilingi Milioni 100, kama pongezi ya kufanikiwa kucheza Robo Fainali Ligi ya Mabingwa Barani Afrika.
Simba SC ilitinga Robo Fainali ya Michuano hiyo mikubwa Barani Afrika katika ngazi ya vilabu, ikimaliza nafasi ya pili kwenye Msimamo wa Kundi C, ikitanguliwa na Raja Casablanca.
Hafla ya kukabidhi zawadi hiyo ya fedha imefanyika leo Jumanne (April 18), katika ofisi za Klabu ya Simba SC, Masaki jijini Dar es salaam.
Kabla ya kukabidhi zawadi hiyo kwa Afisa Mtendaji Mkuu wa Simba SC Imani Kajula, Mkurugenzi wa Masoko M-Bet, Allen Mushi alisema: “Mwaka jana wakati tunasaini mkataba moja ya kipengele ni kutoa bonus kwa kila hatua wanayofika kwenye Ligi ya Mabingwa Afrika kwa kuanzia hatua ya makundi. Leo tunatoa Tsh. 100 milioni na tunawambia tu kuna zingine zitakuja.”
Simba SC itacheza mchezo wa Mkondo wa Kwanza wa Robo Fainali Ligi ya Mabingwa Barani Afrika dhidi ya Mabingwa watetezi Wydad Casablanca Jumamosi (April 22), katika Uwanja wa Benjamin Mkapa jijini Dar es salaam.
Mchezo wa Mkondo wa Pili utapigwa mjini Casablanca-Morocco kati ya April 28-29 kwenye Uwanja wa Mohammed V.
