Kocha Mkuu wa Ruvu Shooting, Mbwana Makata, amesema miongoni mwa sababu ambazo zimefanya timu hiyo kushindwa kubaki Ligi Kuu Tanzania Bara ni pamoja na suala la usajili na ubora wa wachezaji.
Ijumaa (Mei 12) Ruvu Shooting ilipoteza kwa kufungwa mabao 3-0 dhidi ya Simba SC na kuifanya iwe timu ya kwanza kushuka daraja kutoka Ligi Kuu Tanzania Bara na msimu ujao itashiriki Championship.
Makata amesema walikuwa wanajituma kutafuta matokeo mazuri kwenye mechi ambazo wamecheza, lakini matokeo yalikuwa tofauti na walivyotarajia.
“Tulikuwa tunahitaji kupata ushindi, lakini tulishindwa na kuna sababu nyingi ikiwa ni pamoja na usajili kwani ligi hii ina ushindani mkubwa, inahitaji wachezaji imara watakaokuwa na uwezo wa kushindana.
“Kwa mfano mchezo wetu dhidi ya Simba hatujashindwa kutokana na mbinu, bali wachezaji wa Simba SC walikuwa bora zaidi yetu, lakini tuna kazi ya kufanya kwa ajili ya mechi zilizobaki.
“Kilichobaki kwa sasa ni kuangalia mechi zilizobaki na changamoto hazikimbiwi, tutakuwa pamoja ili kujifunza kwenye mapito yote.”
