Mabingwa wa kombe la shirkisho maarufu kama Azam Sports Federation Cup (ASFC) Young Africans, watamenyana na Prisons ya Mbeya Aprili 22, mwaka huu Uwanja wa Taifa, Dar es Salaam katika Robo Fainali ya michuano hiyo.
Taarifa kutoka TFF zimesema kwamba michezo miwili ya mwisho ya Robo Fainali za ASFC zimepangiwa tarehe na pazia la nane bora litafungwa Aprili 22.
Mbali na mchezo kati ya Young Africans na Prisons, Azam FC wataikaribisha Ndanda FC ya Mtwara Aprili 5, mwaka huu Uwanja wa Azam Complex, Chamazi, Dar es Salaam kuanzia Saa 1:00 usiku.
Tayari Simba ya Dar es Salaam na Mbao FC ya Mwanza zimekwishafuzu hatua ya Nusu Fainali baada ya kuzitoa Kagera Sugar ya Bukoba na Madini FC ya Arusha katika Robo Fainali.
Mbao FC iliwafunga Kagera Sugar 2-1 Uwanja wa Kaitaba, Bukoba wakati Simba SC iliwafunga Madini FC 1-0 Uwanja wa Sheikh Amri Abeid mjini Arusha bao pekee la Mrundi, Laudit Mavugo.
