Kufuatia ajali mbaya iliyosababisha vifo vya wanafunzi 29 na walimu 4 wa Shule ya Lucky Vicent ya Jijini Arusha, Waziri wa Mambo ya Ndani nchini, Mwigulu Nchemba ametoa pole kwa familia, ndugu, jamaa na shule hiyo.
“Natoa pole kwa familia,ndugu , jamaa na shule ya Lucky Vincent kwa msiba mzito huu uliolipata Taifa letu uliotokana na ajali mbaya pale Karatu. Tumepoteza watoto wetu ambao wazazi wao,ndugu zao na Taifa kwa ujumla liliwategemea.” amesema Waziri Mwigulu.
Waziri Mwigulu amesema hayo kupitia ukurasa wake wa facebook muda mfupi baada ya tukio hilo kuripotiwa.
Amesema “Kwakuwa mungu wetu anaishi na kumiliki, tuendelee kuziombea familia zilizoguswa na msiba huu, watoto wetu wapumzike kwa Amani.
Pia Chama cha ACT-Wazalendo kimetoa pole kwa wazazi, ndugu jamaa wa familia zilizopatwa na msiba huo uliotokana na ajali ya basi wilaya ya Karatu mkoani Arusha.
Kiongozi wa ACT wazalendo, Zitto Kabwe kupitia ukurasa wake wa Tweeter amesema kuwa msiba huo ni msiba wa Taifa zima kutokana na kuondokewa na wanafunzi na walimu, Pia amewaombea majeruhi wote wa ajali hiyo wapate kupona kwa haraka.
“msiba huu ni msiba wa Taifa zima kutokana na kuondokewa na wanafunzi na walimu”
