Ni takiribani masaa kumi pekee yamepita tangu msanii Harmonize aiachie rasmi album yake mpya ‘High School’ ambayo ndani ya muda huo, imefanikiwa kuweka rekodi ya kipekee kwa kuchumpa mpaka namba moja kwenye orodha ya albam zenye kufanya vizuri zaidi kwenye mtandao mkubwa wa kusikiliza na kupakua muziki Online Apple Music.
Album hiyo yenye jumla ya nyimbo ishirini, imeachiwa rasmi majira ya saa sita usiku kwa saa za Afrika mashariki na kwa namna ya kipekee mapokezi makubwa yameifanya kusogea kwa kasi namba moja kwenye orodha ya top albums za mtandao huo, ikiwa juu ya album za wasanii wengine kadhaa ikiwamo ‘Only One King’ ya Ali Kiba kwenye nafasi ya pili, ‘Equals’ ya Ed Sheeran kwenye nafasi ya tatu na nafasi ya nne imekaa Extended Playlist (EP) ‘New Chui’ ya Rayvanny.
Kupanda kwa kasi kwa album hiyo ndani ya muda mfupi kwenye mtandao huo kunazaa taswira ya kuwa pengine Mashabiki wa Harmonize waendelee kutegemea kupokea ripoti nyingi zaidi za Album hiyo ikifanya vizuri kwenye platforms mbali mbali.