Mchezaji Mkongwe wa Mabingwa wa Soka Tanzania Bara Simba SC Erasto Nyoni amesema kikosi cha klabu hiyo kipo tayari kupambana bila kuchoka dhidi ya Orlando Pirates ya Afrika Kusini, kwenye mchezo wa Mkondo wa Kwanza Hatua ya Robo Fainali Kombe la Shirikisho Barani Afrika.
Simba SC itaikabili Orlando Pirates kesho Jumapili (April 17), katika Uwanja wa Benjamin Mkapa jijini Dar es salaam, huku Mashabiki na Wanachama wake wakiwa na matuimaini makubwa na timu yao kuibuka na ushindi.
Erasto mwenye sifa ya kucheza nafasi mbalimbali katika kikosi cha Simba SC amesema wanatambua mchezo huo hautakua rahisi, lakini wamejiandaa kupambana kwa nguvu zaidi, ili kuifunga Orlando Pirates ili kujitengenezea mazingira mazuri ya kutinga Nusu Fainali ya Kombe la Shirikisho Afrika msimu huu.
Kiungo huyo amesema hawapaswi kuingia uwanjani na matokeo sababu mpira wa siku hizi una mabadiliko makubwa na timu nyingi zimejipanga, hivyo kila mchezaji atakayepata nafasi ya kuanza lazima acheze kupigania mafanikio hayo.
Nyoni amesema pamoja na yote, lakini anaamini timu yao safari hii wamejipanga vizuri na watashinda mchezo huo wa Jumapili dhidi ya Orlando Pirates na kutimiza malengo yao.
“Tunacheza na timu nzuri na ngumu, hatupaswi kujiamini hata kama tunacheza nyumbani,”
“Wenzetu wana uzoefu na mashindano haya, hivyo lazima tuwape heshima yao na kutimiza ipasavyo kila ambacho kocha atatuagiza.” amesema Nyoni.
Kiungo huyo pia ameaomba mashabiki wao kujitokeza kwa wingi uwanjani, kuwaunga mkono, ili kuweka historia mpya ya kutinga Nusu Fainali kwenye michuao hiyo ya Afrika.
