Meneja wa Kikosi cha Manchester United Erik Ten Hag amewaambia mastaa wake kama wanaona hawataki kuipigania klabu hiyo wanapaswa kuondoka haraka iwezekanavyo, kauli hiyo aliizungumza kupitia waandishi wa habari kabla ya mchezo wa jana Jumatano (April 05) wa Ligi Kuu ya England dhidi ya Brentford.
Ikicheza katika Uwanja wa nyumbani Old Trafford Manchester United, ilifanikiwa kuchomoza na ushindi wa 1-0, ikitanguliwa kufungwa na Newcastle United katika mchezo uliopita kwa kichapo cha mabao 2-0 mwishoni mwa juma lililopita.
Meneja huyo kutoka nchini Uholanzi alionyesha kukerwa na kiwango kibovu cha wachezaji wake katika mchezo dhidi ya Newcastle Unites, baada ya kushinda michezo mitatu tu katika michezo minane ya mwisho ya ligi ugenini
Kutokana na kauli ya Ten Hag, maswali mengi yaliulizwa kuhusu hatima ya Harry Maguire, Anthony Martial na Jadon Sancho kwa sababu viwango vyao bado havijaridhisha.
“Nimekubali vijana wamerudia tabia zao za zamani, lakini tunachotakiwa tuwe kama maroboti au mashine, vijana waonyesha ubora kwenye mechi, kama timu haipati matokeo mazuri kila mtu atasikitika, lakini ndio kazi yetu, vijana wangu wanacheza kwa ari, tumeonyesha kwenye mechi zetu kubwa zilizopita.”
“Wachezaji wanatakiwa wapambane kila mechi, hiyo ndio Man United ninayoitaka,” amesema Ten Hag.
