Idara ya Habari ya Mabingwa wa Soka Tanzania Bara Simba SC, imetoa taarifa ya kutaja tarehe rasmi ya Tamasha la Simba Day 2021.
Mapema hii leo kurasa za mitandao ya kijamii zinazoendeshwa na idara hiyo, zimepambwa kwa kiashiria cha uwepo wa Tamasha la Simba Day 2021.
Kaimu Afisa Habari wa Simba SC Ezekiel Kamwaga amesema baadae leo Alhamisi (Agosti 26) watatangaza tarehe maalum ya Tamasha hilo ambalo hufanyika kila mwaka kwa kuwakutanisha pamoja Mashabiki na Wanachama.
Kamwaga amesema maandalizi ya Tamasha la Simba Day 2021 yanaendelea vizuri na kikosi chao kitacheza mchezo wa kimataifa wa kirafiki dhidi ya timu kubwa na yenye hadhi Barani Afrika.
“Tutatangaza tarehe rasmi ya Tamasha letu la Simba Day, maandalizi yanakwenda vizuri hadi sasa.”
“Siku ya kilele cha Simba Day kikosi chetu kitacheza mchezo wa kirafiki dhidi ya timu kubwa hapa Afrika, tunataka kujitofautisha na timu nyingine zinazocheza na vitimu vidogo vidogo.” amesema Kamwaga.
Katika hatua nyingine Kamwaga ameongeza kuwa mchezaji wao Ibrahim Ajib tayari amesaini mkataba mpya wa miaka miwili kuendelea kuitumikia Simba na yupo kambini na wenzake.
