Mizigo mikubwa waliyonayo wanawake ni miongoni mwa changamoto za kijamii ambazo zimekuwa kikwazo kwa wao kushiriki kikamilifu katika masuala ya siasa.
Hayo yamesemwa na Balozi Getrude Mongella ambaye pia ni Rais Mstaafu wa Bunge la Afrika alipokuwa akizungumzia ushiriki wa wanawake katika siasa nchini.
“Changamoto kubwa ni pamoja na teknolojia duni ambayo inamlazimisha mwanamke kuendelea kulima kwa kutumia jembe la mkono, kutembea umbali mrefu kutafuta maji, kutafuta kuni na suala zima la kulea watoto” amesema Balozi Mongella.
Aidha, akizungumzia suala la teknolojia duni amesema kuwa katika nchi zinazoendelea hilo limeendelea kuwa tatizo kubwa na kwa kuwa wanawake ndio wazalishaji mali wakubwa, wamejikuta wanaweka nguvu zao nyingi katika matumizi ya jembe la mkono. Hivyo ukulima kwa kutumia jembe la mkono haukidhi mahitaji yao ya chakula katika familia na kujikuta wamebaki kuwa omba omba.
Pamoja na changamoto hizo Balozi Mongella amesema kuwa ushiriki wa wanawake bado ni mkubwa na ameitaka jamii kuwawezesha kubeba baadhi ya mizigo kwa mfano kuimarisha huduma za afya ya jamii.
Vile vile, Mongella ametoa ushauri kwa jamii kutokukaa kimya bali kuzungumzia changamoto hizo na utatuzi wake ikiwa ni pamoja na kuwaelimisha wanaume, kwani wakielimika na kutumika vizuri baadhi ya changamoto zitaondoka na kasi ya mwanamke kupiga hatua itakuwa kubwa.
Naye Mwenyekiti wa Chama cha ACT-Wazalendo ambaye alikuwa Mgombea Urais pekee mwanamke katika uchaguzi uliopita wa 2015, Mama Anna Mgwira amesema wanawake wakipewa nafasi wanajitoa kwa ukamilifu hivyo amewataka wasimamie nafasi zao huku wakifanya kazi kwa weledi, uaminifu, wajiheshimu na wawajibike ili kuondokana na dhana ya kwamba hawawezi kazi bila kusimamiwa na kusaidiwa
