Mshambuliaji wa Ihefu FC, Moubarack Amza amesenma anafurahia maisha ndani ya timu hiyo huku akieleza shauku yake kubwa ni kuhakikisha kikosi hicho kinaleta ushindani mkubwa msimu huu katika michuano mbali mbali.
Moubarack amesema licha ya kuanza maisha mapya ila anafurahia mwanzo wake mzuri na timu hiyo.
“Naamini tutafanya vizuri zaidi msimu huu tofauti na ilivyokuwa msimu uliopita kutokana na ushirikiano baina yetu wachezaji, viongozi na benchi la ufundi, ligi ndio kwanza imeanza hivyo tegemeeni makubwa,” amesema.
Aidha Moubarack amesema licha ya kufunga bao moja hadi sasa katika Ligi Kuu Bara ila hataki kuweka wazi idadi kamili va mabao anayotarajia kuyafunga msimu huu huku akieleza atakachokifanya ni kuipambania timu tu.
“Ni ngumu kusema nataka kufunga mabao 10 au zaidi ila ninachokiomba ni kuendelea kuaminiwa na benchi langu la ufundi na kumuomba Mwenyezi Mungu aniepushe na majeraha kwa sababu hayo mengine yatakuja yenyewe tu.”
Nyota huyo wa Cameroon alijiunga na timu hiyo msimu huu baada ya kumalizika kwa mkataba wake na ‘Wagosi wa Kaya’ Coastal Union na msimu uliopita alionyesha kiwango bora kwani alimaliza na mabao saba ya Ligi Kuu Bara.
