Beki kutoka nchini Ivory Coast na klabu ya Simba SC Pascal Wawa, amewataka mashabiki wa timu hiyo kupunguza presha ya ubingwa wa Ligi Kuu Bara licha ya Young Africans kuongoza ligi kwa pointi nyingi kwa kuwa bado ubingwa upo wazi, hauna mwenyewe.
Wawa ametoa kauli hiyo, huku Young Africans ikiendelea kuwa kileleni kwa kufikisha alama 48 ikifuatiwa na Simba SC wenye alama 37, wakiwa nyuma kwa mchezo mmoja dhidi ya vinara wa ligi hiyo.
Wawa amesema haoni sababu ya mashabiki wa Simba SC kuwa na presha ya ubingwa kutokana na kasi ya wapinzani wao, wakati wao wanashiriki michuano ya kimataifa.
“Nadhani suala la kuwa na presha ya ubingwa kwa sasa halipaswi kuwepo kwa mashabiki wetu kwa sababu bado tuna mechi nyingi za kucheza lakini hakuna mwenye uhakika wa kuchukua, isipokuwa wapo ambao wanaongoza ligi tu.
“Kikubwa ni wao kuendelea kutuunga mkono katika mechi zetu za ligi ili tuweze kushinda zote na kuweza kufanikiwa kutetea ubingwa wetu licha ya kuwa na michuano ya kimataifa ambayo tunaendelea kufanya vizuri,” amesema Wawa.
Tayari Young Africans imeshashuka dimbani mara 18, huku Simba SC ikicheza michezo 17 hadi sasa ya Ligi Kuu.
