Rais wa Jamhuri ya Muungano wa Tanzania, Dkt. John Magufuli amemtaka Mkuu wa Mkoa wa Dar es Salaam, Paul Makonda kuendelea kuchapa kazi kwani yeye hafanyi kazi kwa kufuata maneno ya kwenye mitandao.
Akizungumza leo katika uzinduzi wa barabara ya juu (flyover) ya Ubungo jijini humo, Rais Magufuli amesema kuwa yeye ni rais anayejiamini, hivyo hapangiwi mambo ya kufanya.
“Mimi ni rais ninayejiamini, sipangiwi mambo ya kufanya. Hata fomu ya kugombea nilikwenda kuichukua peke yangu. Kwahiyo, Makonda wewe chapa kazi,” alisema Rais Magufuli.
Kauli hiyo ya Rais Magufuli imekuja ikiwa ni saa chache baada ya Waziri wa Habari, Utamaduni, Vijana, Sanaa na Michezo kuzitembelea ofisi za Clouds Media Group akiongozana na ujumbe wa umoja wa wamiliki wa vyombo vya habari nchini ambapo alitangaza kuwa ameunda kamati ya watu watano watakaomuhoji Mkuu huyo wa Mkoa kuhusu tukio hilo kabla ya kutangaza hatua za kuchukuliwa.
Mapema leo asubuhi, Mkurugenzi wa vipindi wa Clouds Media Group, Ruge Mutahaba alieleza kusikitiswa na kitendo cha Mkuu wa Mkoa wa Dar es Salaam kuingia katika studio hizo akiwa na askari sita wenye bunduki akidai kuwa walilazimisha kurushwa kwa habari waliyoitaka kwenye kipindi cha ‘Shilawadu’.
Alisema kuwa habari hiyo ilikuwa ikimuonesha mwanamke mmoja ambaye alidai kuwa alizaa na Askofu wa Kanisa la Ufufuo na Uzima, Josephat Gwajima, lakini watangazaji wa kipindi hicho walikataa kufanya hivyo kutokana na maelekezo waliyopewa na viongozi wa kituo hicho. Alisema alichukua uamuzi huo kwani watangazaji walidai hawakuzungumza na Gwajima ambaye alikuwa mtuhumiwa, hivyo hakukuwa na pande zote mbili kupata msawazo.
