Kocha Mkuu wa Klabu ya D.C. United, Wayne Rooney, amesema Mshambuliaji mpya wa Inter Miami Lionel Messi hatokuwa na kazi rahisi katika Ligi Kuu ya Marekani (MLS).
Katika mahojiano na gazeti la The Times la London, mchezaji huyo wa zamani wa Manchester United, Rooney alisema wachezaji wengi wanafika MLS na wanatatizika kuzoea na kwamba Messi anaweza kuwa hana tofauti.
“Kila kitu kimewekwa kwa ajili yake,” alisema Rooney.
“Wenzake (Sergio) Busquets na Jordi Alba wamesaini Inter Miami na huenda (Andres) Iniesta akajiunga nao. Luis Suarez pia. Messi ana kocha (Miami Tata Martino) anayempenda na kumwamini.
“Hatapata jambo rahisi hapa. Inasikika kuwa wazimu, lakini wachezaji wanaoingia wanakuta ni ligi ngumu, Kusafiri, hali tofauti katika miji tofauti, na kuna nguvu nyingi na nguvu uwanjani.”
Baada ya kuondoka United baada ya miaka 14, Rooney aliichezea D.C. United mechi 52 katika kipindi cha miaka miwili kuanzia 2018 hadi 2020, akifunga mabao 25, kabla ya kurejea kama kocha Julai mwaka jana.
Messi alitambulishwa katika hafla iliyofanyika kwenye Uwanja wa DRV PNK wa Inter Miami huko Fort Lauderdale. Florida juzi, Jumapili (Julai 16).
Mshambuliaji huyo wa Argentina anajiunga na Miami baada ya kuachana na mabingwa wa Ufaransa, Paris Saint-Germain baada ya misimu miwili katika klabu hiyo. Ametia saini mkataba hadi mwisho wa msimu wa 2025.
Klabu hiyo imesema Messi atacheza mechi ya kwanza Julai 21, mwaka huu, ya Kombe la Ligi dhidi ya Cruz Azul ya Mexico.
