Dr. Nasriya Ali, Anaelezea Jinsi ya Kupiga Mswaki Sahihi kwa Afya Bora ya Kinywa na Meno.
Unapofikiria kuhusu utunzaji wa afya ya kinywa, moja ya mazoea ya kila siku ambayo usipopiga kwa usahihi yanaweza kuathiri afya ya kinywa na meno .Lakini je, unajua kwamba kuna njia sahihi ya kufanya hivyo ili kuhakikisha afya bora ya kinywa na meno?
Kupiga mswaki ni hatua muhimu katika kudumisha afya ya kinywa na meno. Lakini mara nyingi, watu hufanya makosa yanayoweza kusababisha matatizo ya kinywa na meno. Dr. Nasriya Ali kutoka Hospitali ya Rufaa ya Mkoa Temeke anasema.
“Moja ya makosa yanayofanyika ni suala la kusukutua baada ya kupiga mswaki. Kusukutua kunasababisha kuondoka kwa madini yaliyopo katika dawa ya mswaki ambayo yalitakiwa kubaki kwa ajili ya kulinda meno. Dr. Nasriya Ali anashauri njia sahihi ya upigaji mswaki na vitu vya kuzingatia wakati wa kupiga mswaki.
Hivyo basi Kabla hujaanza kupiga mswaki kuna vitu unatakiwa kuvizingatia Tumia Mswaki mzuri Mswaki
mzuri ni ule wenye nyuzi au brashi laini, kulingana na umri wa mtumiaji. kuna miswaki ya watoto na ya watu wazima. Kutumia Mswaki wa aina hii utawezesha kufikia maeneo yote ya meno bila kusababisha madhara katika meno na fizi.
*Kuzingatia aina ya dawa*
unaweza kutumia dawa ya aina yoyote lakini dawa inapaswa kuwa na madini ya floride madini ya floride ni madini yanayozuia meno kutoboka na kufanya meno kuwa imara, na ndio maana unapo maliza kupiga mswaki hupaswi kusukutua na maji, unatakiwa kuacha hivyo hivyo ili kuruhusu madini yaliyopo katika dawa ya mswaki kufanya kazi yake katika kinywa chako.
*Kupiga mswaki kwa usahihi au kutumia njia sahihi ya kupiga mswaki* njia sahihi ni kama ifuatavyo, utachukua mswaki wako na kuweka dawa ya meno yenye madini ya floride utaanza kupiga kwa taya moja moja kwa kupindisha mswaki wako kidogo kuelekea kulia ama kushoto, utaanza kupiga mswaki kwa mwendo wa kuzungusha taratibu ili kuwezesha mswaki kuingia katikati ya meno na kuepusha kuumiza fizi.
Meno ya mbele juu unatakiwa kusimamisha mswaki na kusafisha. Utasafisha pia maeneo ya nyuma ya meno yanayohusika na utafunaji na utafanya hivyo hivyo kwa taya nyengine ni na kumalizia kwa kusugua ulimi kwa taratibu.
*Muda unaotumia kupiga mswaki*
Unatakiwa Kupiga mswaki kwa dakika zisizopungua dakika mbili, Unatakiwa kupiga mswaki mara mbili kwa siku yaani baada ya kunywa chai asubuhi ili kuzuia mabaki ya chakula yasiwepo kwenye kinywa muda mrefu na wakati wa kwenda kulala na kabla ya kulala unapaswa kupiga mswaki.
Dr. Nasriya Ali anasisitiza umuhimu wa kutembelea daktari wa meno kwa ukaguzi na uchunguzi wa kawaida angalau mara mbili kwa mwaka. Anasema, “Uchunguzi wa kinywa na meno unaweza kugundua mapema matatizo yoyote na kuchukua hatua za haraka.”
Na katika Hospitali ya Rufaa ya Mkoa Temeke kuna madaktari bingwa na vifaa vinavyowezesha utoaji huduma sahihi wa kinywa na meno ambao watu wengi wanaweza wakapuuzia matatizo walionayo.
Kwa kumalizia, Dr.Nasria Ali anasema, “Upigaji mswaki ni mazoea rahisi lakini muhimu kwa afya ya kinywa na mwili kwa ujumla. Kwa kufuata njia sahihi na kujali afya yako ya kinywa, unaweza kuhakikisha una kinywa kizuri na chenye afya kwa maisha yako yote.”
Kuwa na kinywa chenye afya ni muhimu sana kwa afya ya jumla. Kwa kuzingatia ushauri wa mtaalamu wa kinywa na meno, unaweza kuboresha afya yako ya kinywa na kufurahia maisha bora zaidi.
