Imeelezwa kuwa pindi Ujenzi wa Kiwanja cha Ndege cha Musoma utakapokamilika utafungua usafiri wa anga kwa mkoa wa Mara na kuwa kiunganishi kikubwa na mikoa jirani ya Kanda ya Ziwa.
Hayo yamesemwa mkoani Mara na Waziri wa Ujenzi na Uchukuzi, Prof. Makame Mbarawa, wakati akikagua ujenzi wa barabara ya kuruka na kutua ndege kwa kiwango cha lami wenye urefu wa kilometa 1.75 ambapo utaruhusu ndege za Q400 Bombadier kutua kwa urahisi kiwanjani hapo.
Prof. Mbarawa amesema ameridhishwa na maendeleo ya ujenzi wa Kiwanja cha Ndege cha Musoma unaogharimu kiasi cha shilingi bilioni 35.047 na mkandarasi anayetelekeza mradi huo ni Beijing Construction Company Limited ambapo kazi zinaendelea kwa kasi.
“Kiwanja cha Ndege cha Musoma kitakapokamilika kitafungua anga kwa kiasi kikubwa na kukuza uchumi wa mkoa wa Mara na mikoa jirani”, amesema Prof. Mbarawa.
Kuhusu suala la fidia, Waziri Mbarawa amesema Serikali imekwisha lipa fidia kiasi cha shilingi Bilioni 3.955 kwa wananchi waliopisha ujenzi huo.
Prof. Mbarawa amesema kiasi cha shilingi Bilioni 1.047 zitalipwa kwa ajili ya kulipa fidia wananchi 291 waliothiriwa na ujenzi wa barabara hiyo.
Barabara hiyo ni sehemu ya barabara kutoka Musoma – Arusha kupitia Serengeti Mto wa Mbu ambayo ni kiungo muhimu kati ya Mikoa ya Kanda ya Ziwa na Kanda ya Kaskazini na nchi jirani ya Kenya.
Kaimu Meneja wa Kiwanja cha Ndege cha Musoma, Bw. Frank Msoffe amesema kuwa ujenzi wa kiwanja hicho utakapokamilika utatoka katika daraja la 2C na kwenda 3C na kuruhusu kupokea ndege zenye uwezo wa kubeba abiria 70 hadi 80.
