Jumla ya wagonjwa 11 wamefanyiwa upasuaji wa moyo katika kambi maalum ya matibabu ya moyo inayofanywa na madaktari bingwa wa upasuaji wa moyo kutoka Taasisi ya Moyo Jakaya Kikwete (JKCI) kwa ushirikiana na madaktari wenzao wa Taasisi ya Open Heart International ya nchini Australia.
Hayo yamesemwa na Mkurugenzi wa Upasuaji wa Moyo ambaye pia ni Daktari bingwa wa upasuaji wa Moyo Bashir Nyangasa wakati akielezea jinsi kambi hiyo ya upasuaji inavyoendelea kutoa matibabu kwa wagonjwa.
Dkt. Nyangasa amesema katika kambi hiyo ambayo inamalizika muda wake tarehe 17/3/2017 wamepanga kufanya upasuaji kwa wagonjwa 25 kati ya hao watoto ni 15 na watu wazima ni 10.
Aidha, Kuhusu uhitaji wa damu kwa wagonjwa wanaofanyiwa upasuaji wa Moyo Dkt. Nyangasa amesema wagonjwa hao wanahitaji damu nyingi hivyo basi amewaomba wananchi wajitokeze kuchangia damu ambayo itatumika kwa wagonjwa.
“Tunaomba wananchi wajitokeze kwa wingi kuchangia damu na uchangiaji huu wa damu usifanyike mara moja bali uwe endelevu kwani Taasisi inatoa huduma kwa wagonjwa wakati wote siyo wakati wa kambi maalum za matibabu ya moyo pekee yake”, amesema Dkt. Nyangasa.
Hata hivyo, Tangu kuanza kwa mwaka huu wa 2017 JKCI kwa kushirikiana na baadhi ya washirika wake wa nje ya nchi ambao ni Madaktari Afrika wa Marekani, Hospitali za Apolo Bangalore na BLK zote za nchini India na Open Heart International ya Australia wamefanya matibabu ya moyo ya kufungua na bila kufungua kifua kwa wagonjwa wa moyo wanaotibiwa katika Taasisi hiyo
