Wafariki kwa kufunikwa na jiwe

Faisary Ahmed – Bukoba.

Watoto wawili wa familia moja, wamekutwa wamefariki baada ya kufunikwa na jiwe wakati wakichimba mchanga eneo la Maharahara, lililopo katika Kijiji cha Magata kata ya Magata Karutanga, Wilayani Muleba Mkoani Kagera.

Akithibitisha kutokea kwa tukio hilo, Diwani wa kata hiyo, Alhaj Yakoub Mahamud amewataja watoto hao kuwa ni Samson Eliudi (13) na Emmanuel Eliud (10), ambao wote walikuwa ni wanafunzi wa Shule ya Msingi Magata na walikuwa wakichimba mchanga walipotoka shuleni baada ya baba yao mzazi kutelekeza familia na kubaki na mama yao.

• Mambo 10 ya kukuletea mabadiliko maishani

Kufuatia tukio hilo, Mkuu wa wilaya ya Muleba, Dkt. Abel Nyamahanga amepiga marufuku shughuli za uchimbaji mchanga eneo hilo na kuwasihi wazazi kutokimbia familia zao kwani matukio ya namna hiyo husababishwa na vitendo hivyo.

• Kitwanga amshukia Waziri wa Rais Samia

• Mabaki ya miili ajali ya Nyambizi Titan yapatikana

Amesema, “kuanzia muda huu haya maeneo yamefungwa rasmi ni wajibu wa serikali ya kijiji kuendelea kupitia maeneo haya ili tusione awe mtu mzima au mtoto mdogo kuendelea kuchimba mchanga na tunapoyaona matukio kama haya watoto wanatangatanga tuzikusanye hizo taarifa na tuzifanyie kazi.”

Kwa upande wao, Wananchi licha ya kusikitishwa na tukio hilo, wameiomba serikali kupitia ustawi wa jamii kubaini wazazi wanaotelekeza watoto kuchukuliwa hatua na kuwasaidia kutojihusisha na kazi hatarishi huku wanafamilia wakiruhusiwa kuendelea na utaratibu wa mazishi.

• Fidia ya ardhi: Majaliwa aziagiza Halmashauri