Waziri wa Nchi, Ofisi ya Rais (TAMISEMI), Mohamed Mchengerwa amefungua kikao kazi cha Maofisa Utumishi wa Sekretarieti za Mikoa na Mamlaka za Serikali wanaohakiki kwa kina changamoto za walimu hususan upandishwaji wa vyeo.
Akifungua kikao hicho jijini Dodoma, Waziri Mchengerwa amesema katika kuhakikisha kuwa malalamiko ya Walimu yanashughulikiwa, Ofisi ya Rais TAMISEMI kwa kushirikiana na Ofisi ya Rais UTUMISHI iliagiza Tume ya Utumishi wa Walimu kufanya uchambuzi na kubaini walimu wote wenye changamoto katika upandaji wao wa vyeo.
Amesema, “uchambuzi umefanyika na walimu zaidi ya 136,000 wamebainishwa kuwa na changamoto, pamoja na kazi nzuri iliyofanyika, kwa kuwa lengo la Serikali ni kuhakikisha kuwa malalamiko ya walimu wote yanashughulikiwa kwa ufanisi, nimeelekeza uhakiki wa kina ufanyike kwa kuhusisha taarifa za watumishi kama zilivyo kwenye Mfumo wa Taarifa za kiutumishi na Mishahara (HCMIS).”
Aidha, Waziri Mchengerwa ameagiza kushughulikia kikamilifu changamoto hizo ndani ya siku 14 na kuifanya kazi hiyo kwa ufanisi wa hali ya juu, ili kuhakikisha hakuna Mwalimu anayeachwa baada ya zoezi hilo kufanyika.
Hata hivyo, amewakumbusha Waajiri na Mamlaka zote zinazohudumia Walimu kusimamia vyema maslahi ya walimu ikiwa ni pamoja na kutatua kero walizo nazo.
