Waziri wa Ujenzi, Innocent Bashungwa ameagiza kuondolewa kwa wataalam wote wanaosimamia ujenzi wa Barabara ya Kibaoni – Sitalike, sehemu ya kwanza ya Kibaoni – Mlele (km 50) kwa kiwango cha lami kutokana na ujenzi wa mradi huo kusuasua na utekelezaji wake kuwa nyuma kwa asilimia 23.71.
Bashungwa ametoa agizo hilo hii leo Aprili 8, 2024 mkoani Katavi wakati akizungumza na wananchi wa Kata ya Kibaoni, Mkoani Katavi mara baada ya kukagua mradi huo ambao kwa sasa umefikia asilimia 14.7 na kutoridhishwa na kasi ya usimamizi na utekelezaji wa mradi huo.
Ameagiza kuondolewa kwa Wataalam wote wa Mhandisi Mshauri wa Mradi Kampuni ya Crown Tech, Msimamizi wa Mradi kutoka Makao makuu ya TANROADS, Eng. Ramadhan Myanzi pamoja na Msimamizi wa Mradi Mkoa wa Katavi, Eng. Albert Laizer.
Aidha, Bashungwa amebaini ubovu wa mitambo mingi ya Mkandarasi na amemuagiza Katibu Mkuu wa Wizara ya Ujenzi kupeleka timu ya wataalamu kufanya ukaguzi wa mitambo iliyopo eneo la mradi na kutambua mingapi inafanya kazi na mingapi haifanyi kazi pamoja na kuchukua hatua za kimkataba kwa Mkandarasi na Mhandisi Mshauri.
Bashungwa pia amemuagiza Msajili wa Bodi ya Usajili wa Makandarasi (CRB) kuanza kumkagua Mkandarasi CRSG ambaye amekuwa akisumbua katika miradi mingi pamoja na kufika katika mradi huo kuangalia kwa mujibu wa sheria kama anafaa kuendelea kupata kazi na hatua za kisheria zichukuliwe.
Amesema, amebainisha miradi ya barabara inayoendelea katika Mkoa wa Katavi ambayo inaunganisha na Mkoa wa Kigoma na kusema kuwa tayari Serikali imekamilisha ujenzi wa barabara ya Mpanga – Vikonge (km 37) kwa kiwango cha lami.
Ametaja miradi mingine inayoendelea ikiwemo barabara Vikonge – Luhafwe (km 25) ambayo upo asilimia 57.4 na unagharimu Bilioni 35.6, barabara ya Luhafwe – Mishamo (km 37) upo asilimia 10 ya utekelezaji na unagharimu Bilioni 58.3 pamoja na barabara inayoelekea Bandari ya Kalema kutoka Kagwira zaidi ya kilometa 112 Mkandarasi ameshapatikana na mwaka huu barabara hiyo itaaza kujengwa kwa kiwango cha lami.
