Naibu Waziri wa Mambo ya Ndani ya Nchi, Mhandisi Hamad Masauni ametoa agizo kwa mkuu wa Jeshi la Polisi Nchini, IGP Simon Sirro kutuma timu ya wataalamu kutoka Makao Makuu ya jeshi ili kufika wilayani Ikungi ikiwa ni kuharakisha Ujenzi wa Kituo kipya cha Polisi Wilayani hapo sambamba na chumba cha mahabusu ambacho si sahihi kiafya kwa matumizi ya binadamu.
Ameyasema hayo baada ya kutembelea kituo chakavu na ofisi za polisi wilayani hapo ikiwa ni ombi la mbunge wa Singida Mashariki, Miraji Mtaturu aliloomba katika Bunge lililoisha hivi karibuni.
Akizungumza katika ziara hiyo Mbunge wa Singida Mashariki, Miraji Mtaturu amesema anaishukuru serikali kusikia ombi lake huku akiweka wazi hali mbaya katika kituo hicho.
Naye mkuu wa Wilaya ya Ikungi, Edward Mpogoro amesema uwepo wa kituo hicho kipya kikikamilika kitaimarisha Ulinzi na Usalama wilayani hapo.
