Mpango ‘Nyuki wa Manzuki’ kutoathiri uhifadhi

Serikali nchini, imejipanga kuanzisha mpango wa ufugaji nyuki ujulikanao kama Manzuki, watakaokuwa wanafugwa katika eneo maalum bila kuathiri uhifadhi.

Hayo yamesemwa na Naibu Waziri wa Maliasili na Utalii, Mary Masanja alipokuwa akizungumza na wananchi wa Kata ya Uyovu, iliyopo Wilaya ya Bukombe Mkoani Geita.

Amesema, kupitia mpango huo wananchi wataweza kufuga nyuki na kupata faida bila kuhama kuhama kama ilivyozoeleka kwa wale wa asili.

• Mapigano yazuka upya jirani na eneo la Tigray

• Serikali kupunguza deni la mkopo kwa wanafunzi Elimu ya juu

Kuhusu wananchi wanaofuga nyuki katika Hifadhi ya Kigosi, amesema kuwa Serikali imeruhusu wananchi kuendelea na shughuli za ufugaji nyuki wakati inatafuta eneo mbadala la kuwahamishia wafugaji hao.

“Tamko la Serikali ni kwamba shughuli za ufugaji nyuki zitaendelea hadi pale tutakapotoa mbadala wa wapi mpeleke mizinga yenu.” Masanja amesisitiza.

Aidha, amewataka wananchi kukitumia ipasavyo Kiwanda cha kuchakata asali kilichopo katika eneo hilo, ili waweze kuuza asali kwa faida na kuwasisitiza kuhusu suala la utunzaji wa mazingira na kuacha kukata miti hovyo ili kuendelea kufaidika na mazao ya nyuki.

• UN yataka Mataifa kuchukua hatua kali kwa wakeketaji

• Kenya: Mahakama yafungwa ili kusikiliza kesi ya uchaguzi

Awali, Waziri wa Madini na mbunge wa jimbo la Bukombe, Dkt. Doto Biteko amesema, Rais Samia anataka kuona kero za wananchi wakiwemo wa Uyovu zinatatuliwa na ndiyo maana Naibu Waziri amefika, hivyo wananchi wawe wahifadhi kwa kuilinda misitu ya Bukombe isiharibiwe.

Naibu Waziri, Mary Masanja anaendelea na ziara yake katika Kanda ya Ziwa kwa lengo la kusikiliza na kutatua changamoto zinazoikabili Sekta ya Maliasili na Utalii.

• Maandamano kupinga gharama za Maisha yashika kasi