Rais Mstaafu wa awamu ya nne Dkt. Jakaya Kikwete amesema Marehemu Bernard Membe alikuwa Mwanadiplomasia mbobezi, Mwanamikakati makini na mchumi mzuri.
Kikwete ameyasema hayo katika ibada ya mazishi ya Marehemu Membe iliyofanyika kijijini cha Chiponda, kilichopo Rondo Mkoani Lindi na kuongeaza kuwa katika kipindi cha miaka tisa akiwa Waziri wa Mambo ya Nje alifanya kazi kubwa ya kuendeleza maslahi ya Tanzania katika medani za Kimataifa na kikanda.
Naye Mbunge wa Jimbo la Mtama na Waziri wa Habari, Mawasiliano na Teknolojia ya Habari, Nape Nnauye amesema Membe alikuwa mwalimu wa wengi, mzalendo, jasiri na mwenye mapenzi makubwa kwa nchi.
Marehemu Bernard Membe ambaye aliwahi kuwa Waziri wa Mambo ya Nje na Uhusiano wa Kimataifa alifariki Mei 12, 2023 katika hospitali ya Kairuki Jijini Dar es Salaam na kuzikwa Mei 16, 2023 Kijijini kwake Chiponda – Rondo, Mkoani Lindi.
