Washika Bunduki wa kaskazini mwa jijini London (Arsenal), wamefanikiwa kuirejesha Manchester United mpaka nafasi ya sita, kwenye msimamo wa ligi kuu ya soka nchini England, baada kuifunga Southampton mabao 2-0.
Mchezo huo wa kiporo ulichezwa kwenye uwanja wa St.Mary’s na kuchezeshwa na mwamuzi John Moss.
Mabao ya Arsenal yalipatikana katika kipindi cha pili kupitia kwa mshambuliaji kutoka Chile Alexis Sanchez aliyefunga bao la kwanza katika dakika ya 60, kabla ya Olivier Giroud kuongeza la pili kwa kichwa katika dakika ya 84.
Ushindi huo umeifanya Arsenal ichupe mpaka nafasi ya tano baada ya kufikisha pointi 66, Pointi moja zaidi ya Manchester United ambayo sasa imeshuka mpaka nafasi ya sita ikiwa na pointi zake 65.
Aidha katika mchezo huo Arsenal ilipata pigo, kufuatia majeraha ya misuli ya paja yaliyomkabili winga Alex Oxlade Chamberlain ambayo yanahofiwa huenda yakamuweka nje ya dimba mpaka mwisho wa msimu.
