Mtendaji wa Kata ya Mwadui iliyopo mwambao wa Bonde la Ziwa Rukwa, Wilayani Sumbawanga, Benedict Chapewa ameuawa kwa kupigwa risasi na watu wasiojulikana.
Akizungumza tukio hilo, kamanda wa polisi Mkoa wa Rukwa George Kyando amesema tukio hilo limetokea usiku wa kuamkia leo.
Kamanda kyando amesema kuwa Chapewa ambaye amewahi kuwa katibu Mwenezi, CCM Wilaya ya Sumbawanga alivamiwa na kundi la watu wasiojulikana wakati akiwa anakunywa pombe katika moja ya baa anayomiliki kijijini hapo.
-
Serikali yapata mwekezaji mpya mradi wa mabasi ya mwendokasi
-
Serikali kumwaga ajira za Walimu shule za msingi
Watu hao walimmiminia risasi kwa kutumia bunduki aina ya gobore kisha kumkata kata na mapanga sehemu mbalimbali za mwili wake.
Kamanda Kyando amesema uchunguzi wa kina kuhusu tukio hilo unaendelea kufanyika na watuhumiwa wanasakwa popote walipo ili sheria iweze kuchukua mkondo wake.
Ametoa wito kwa wananchi wa mkoa huo kuacha tabia ya kujichukulia sheria mkononi kwani kufanya hivyo ni ukiukaji wa haki za binadamu na vyombo vya dola vitahakikisha vinawachukulia hatua za kisheria wale wote wanajichukulia sheria mkononi.
