Timotheo Mathayo – Dar es Salaam.
Naibu Waziri Mkuu na Waziri wa Nishati, Dkt. Doto Biteko amezitaka kampuni za Bima nchini kuendelea kutoa elimu kwa umma ili kuwajengea uwezo Wananchi kufahamu faida ya kuwa na bima zitakazowasaidia katika nyanja mbalimbali ikiwemo makazi na usafiri.
Dkt. Biteko, ameyasema hayo wakati akizungumza na Watendaji wa Mamlaka ya Usimamizi wa Bima Tanzania – TIRA, Jijini Dar es Salaam na kudai kuwa ili kuendelea kukuza uchumi wa Taifa kwa ujumla, kampuni za Bima zinatakiwa kutunza fedha zake kwenye Benki za ndani ya nchi jambo ambalo litachochea maendeleo.
Kwa upande wake, Katibu wa Baraza la Mapinduzi Zanzibar na Katibu Mkuu Kiongozi Mha. Zena Ahmed Said ambaye pia ni Balozi wa Bima Tanzania amesema Mamlaka inaendelea na mkakati wa kutoa elimu kwa umma kwa kushirikiana na mashirika ya Serikali na Sekta Binafsi.
Amesema, lengo ni kuwafikia watanzania asilimia 80 wenye zaidi ya umri wa miaka 18 ifikapo mwaka 2030 pia Mamlaka inaendelea na hatua ya kuhamasisha Wizara na Taasisi za Serikali ziweke Bima kwenye miradi inayotekelezwa katika Sekta hizo.
