Mtangazaji mahiri na msiamamizi wa kazi za wasanii maarufu Jr Junior ameonyesha kuogopeshwa na hali mbaya ya kimaelewano pamoja na majibizano yanayoendelea kati ya msanii Diamond Platnumz na Harmonize kwa madai ya kwamba kwa sasa wawili hao wanakoelekea si kuzuri na pengine ugomvi wao ukaleta matatizo makubwa tofauti na wengi wanavyofikiria.
Jr Junior ameutumia ukurasa wake wa mtandao wa Instagram kubainisha anachokiona kwa sasa kati ya wasanii hao mahiri wa muziki wa bongo fleva ukilinganisha na kipindi cha nyuma.
“Hii issue ya Mondi na Harmonize kwa sasa imechukua mwili mpya rasmi, Kama ulikua unasikia tuu Beef sasa ndio hii, Acha kushadadia hili jambo kichwa mchunga, wengi wetu hatujui kiundani nini haswa chanzo cha huu mgogoro tupo tuu nje na tunasikia stori za juu juu ambazo naweza kusema hazina mashiko” ameandika.
Licha ya kutoa maoni yake kuhusu taswira mpya na mbaya ya ugomvi wa wasanii hao waliokuwa wakifanya kazi pamoja kwa zaidi ya miaka minne,
Jr Junior amewashauri vijana walio karibu na wasanii hao wakiwamo wapambe wenye kujihusisha na kusherehesha juu ya ugomvi wa wasanii hao kutojihusisha kabisa na kushadadia kwa namna yeyote kwa kuwa chanzo na uzito wa ugomvi huo wenye kuufahamu kwa undani zaidi ni wao pekee.
“Asitokee mtu akakutia chuki dhidi ya mtu usiemfahamu vizuri, acha uchawa na kuingilia yasiokuhusu, utanishukuru baadae.
Hii naitoa kwa baadhi ya vijana ambao wanaendelea kupoteza heshima na Upendo kutoka kwa wahusika kwa sababu tuu ya kutaka kuonekana na wao wapo mjini, Kaa mbali na haya mambo, utanishukuru baadae”. Aliongeza Jr.
Jr. Ameyasema hayo kufuatia marumbano yanayo endelea kwenye mitandao ya kijamii kati ya msanii Diamond Platnumz na Harmonize, yaliyoibuka kufuatia maneno aliyaandika msanii Diamond kwenda kwa msanii aliye chini ya Label yake Raymond Shabani maarufu Rayvanny baada ya kupata nafasi ya kutumbuiza kwenye hafla ya utilewaji wa tuzo za MTVEM 2021.
Diamond aliandika maneno yaliyotafsiriwa kama vijembe kwa Harmonize ambapo muda mfupi baadaye Harmonize naye kupitia ukurasa wake wa mtandao wa instagram alimjibu kwa kuandika ujumbe mrefu wa fumbo wenye viashiria vya asilimi kubwa kuwa ujumbe huo unatumwa Msanii Diamond platnumz.
