Mshambuliaji wa klabu Bingwa Tanzania Bara Simba SC Chriss Mutshimba Koppe Mugalu, amewataka Mashabiki na Wanachama wa klabu hiyo kutarajia mambo makubwa kutoka kwake msimu ujao wa Ligi Kuu Tanzania Bara.
Mugalu ambaye alisajiliwa Simba SC mwanzoni mwa msimu huu, amesema msimu ujao atakuwa na uzoefu wa kutosha katika Ligi Kuu Tanzania Bara, tofauti na ilivyokua Msimu huu ambao utafikia tamati kesho Jumapili (Julai 18).
“Wanasimba wasiwe na wasiwasi wajiandae kupata burudani zaidi msimu ujao maana nishakuwa mzoefu sasa katika ligi, “amesema Mugalu.
Katika hatua nyingine Mugalu amesema, amefarijika kutwaa taji la Ligi Kuu Tanzania Bara, hivyo ni heshima kubwa kwake na timu kwa ujumla, kwani mafanikio makubwa ya mchezaji ndani ya timu yake ni kutwaa makombe.
Kuhusu mchezo wa Fainali Kombe la Shirikisho (ASFC) dhidi ya Young Africans Mshambuliaji huyo amesema, ni mchezo mkubwa na mgumu kutokana na ushindani wa timu zote.
“Utakuwa mchezo mgumu lakini sisi Kama wachezaji Nia yetu ni kutwaa na taji hilo, tutapambana kadri ya uwezo wetu katika mchezo huo, “
Mchezo wa Fainali Kombe la Shirikisho utachezwa Julai 25, Uwanja wa Lake Tanganyika Mkoani Kigoma.
