Kocha wa Makipa wa Mabingwa wa Soka Tanzania Bara Simba SC, Milton Nienov hatokuwa sehemu ya benchi la ufundi la klabu hiyo, wakati wa mchezo wa Ligi Kuu dhidi ya Young Africans, utakaochezwa keshokutwa Jumamosi (Julai 03), Uwanja wa Benjamin Mkapa jijini Dar es salaam.
Kocha huyo ambaye aliajiriwa Simba SC mwanzoni mwaka huu, ameondoka nchini kuelekea nchini kwao Brazil, kufuatia changamoto za kifamilia, na anatarajiwa kurejea baada ya Julai 03.
Milton amesema yupo nyumbani lakini hana shida yoyote ila hataweza kuwahi mchezo dhidi ya Young Africans: “Sina shida yoyote wala tatizo, bali ni mambo ya kifamilia ambayo nayamaliza.”
Kocha Milton Nienov anaungana na wachezaji Jonas Mkude na Ibrahim Ajibu, ambao hawatokua kwenye kikosi cha Simba, kitakachoikabili Young Africans.
Simba SC inayoongoza msimamo wa Ligi Kuu Tanzania Bara kwa kufikisha alama 73, Jumamosi (Julai 03) itakuwa mwenyeji wa Young Africans iliyo nafasi ya pili kwa kumiliki alama 67, huku Azam FC ikishika nafasi ya tatu kwa kuwa na alama 63.
