Familia ya Mwandishi wa Habari, Erick Kabendera, imethibitisha kuwa Mama mzazi wa mwandishi huyo, Verdiana Mjwahuzi (80), amefariki dunia leo jumanne Desemba 31.
Taarifa kutoka familia hiyo inasema kuwa Marehemu alikuwa akipatiwa matibabu katika Hospitali ya Amana Ilala Jijini Dar es salaam.
Taarifa za awali zinaeleza kuwa msiba wa Mama Erick Kabendera, utakuwa maeneo ya Tabata Chang’ombe karibu na maduka mawili.
Kabendera ambaye kwa sasa yupo rumande alipokamatwa alikuwa akiishi na mama yake ambaye alijitokeza hadharani mbele ya Waandishi wa Habari siku ya Disemba 13, mwaka huu na kumuombea msamaha mwanaye kwa Rais Dkt John Pombe Magufuli, amsamehe mwanaye ili arudi nyumbani kumuuguza.
Erick Kabendera alikamatwa Julai 2019 kwa makosa ya utakatishaji fedha, kukwepa kodi na kushiriki katika genge la uhalifu ambapo kutokana na kosa la utakatishaji fedha hakuweza kupatiwa dhamana.
