Rais wa Zanzibar na Mwenyekiti wa Baraza la Mapinduzi Dkt. Hussein Mwinyi amewasimamisha kazi Wakurugenzi wote wa Halmashauri Wilaya za Unguja.
Huku akielezea baadhi ya sababu Wakurugenzi wa Taasisi Idara za Serikali na Watendaji wengine kusimamishwa ni pamoja na wale waliojihusisha na wizi, kutowajibika kazini na ubadhirifu wa mali za Serikali.
Aidha Dkt. Mwinyi ametangaza kuwasimamisha kazi Watendaji hao katika mkutano wa majumuisho baada ya kuhitimisha ziara yake katika mikoa mitatu ya Unguja.
Baadhi ya Watendaji waliosimamishwa kazi ni Wakurugenzi wa halmashauri za wilaya ya Mjini, Magharibi A na B, Kaskazini A na B, Kusini, Wilaya ya Kati pamoja na Mkurugenzi wa SMIDA.
Akitangaza uamuzi huo, Dkt. Mwinyi amewataka Watendaji wote wa Serikali ya Mapinduzi ya Zanzibar kubadilika na kuacha kufanya kazi kwa mazoea.
Amesema kumekuwa na mikataba mingi ya kifisadi inayofanyika katika baadhi ya halmashauri za wilaya, na kutolea mfano halmashauri ya wilaya ya Mjini ambayo imeingia mikataba ya aina hiyo na kampuni za simu pamoja na mikataba katika uwekaji wa mabango.
