Mabingwa wa Soka Tanzania Bara Young Africans wamekamilisha usajili wa Beki wa Kushoto kutoka DR Congo Joyce Lomalisa Mutambala akitokea Segrada Esperanca ya Angola.
Young Africans imemtambulisha Beki huyo usiku wa kuamkia leo Jumanne (Julai 12), ikiwa ni muendelezo wa kutimiza wajibu wa kuwafahamisha Wanachama na Mashabiki wa Klabu hiyo, kuhusu Usajili unaoendelea klabuni hapo.
Beki huyo mwenye umri wa miaka 29, anakua mchezaji wanne kutoka nje ya Tanzania kusajiliwa Young Africans akitanguliwa na Lazarius Kambole (Zambia), Bernard Morrison (Ghana) na Gael Bigirimana (Burundi).
Tayari uongozi wa Young Africans umeshaweka wazi kwa Mashabiki na Wanachama kwa kusema utasajili wachezaji watano wa Kimataifa katika kipindi hiki cha usajili wa kuelekea msimu mpya wa Ligi Kuu, Kombe la Shirikisho ‘ASFC’ na Michuano ya Kimataifa inayoratibiwa na Shirikisho la Soka Barani Afrika ‘CAF’.
