Meneja wa Klabu Bingwa nchini Hispania Real Madrid Carlo Ancelotti ameapa kutokukata tamaa ya kutetea Ubingwa msimu huu 2022/23, licha ya kuachwa kwa tofauti ya alama 09 dhidi ya vinara FC Barcelona.
Madrid walilazimishwa sare tasa dhidi ya Real Betis katika siku ambayo ingeweza kuwa muhimu kwenye mbio za ubingwa, saa chache baada ya wachezaji 10 wa Barcelona kushinda nyumbani kwa bao 1-0 dhidi ya Valencia.
Baada ya kuona kikosi chake kikishikiliwa kwa mchezo wa pili wa ligi, kutokana na kutoka sare ya bao 1-1 dhidi ya Atletico Madrid wiki iliyopita, Ancelotti alikubali Madrid wana kazi kubwa.
“Si jambo lisilowezekana,”amesema Meneja huyo kutoka nchini Italia akiiambia Movistar wakati alipoulizwa kama kuna matumaini yoyote ya kuikamata Barca.
“Itakuwa ngumu sana, ngumu sana, lakini hatuna shaka tutapambana hadi mwisho.”
“Bila shaka matokeo haya yanaathiri timu. Ikiwa haifanyi hivyo basi huna nafasi ya kuimarika.”
Madrid hawajashinda katika michezo mitatu baada ya kufungwa 1-0 na FC Barcelona katika mchezo wa kwanza wa Nusu Fainali ya Copa del Rey Alhamisi ya juma lililopita.
