Naibu Waziri wa Nishati, Judith Kapinga, amesema kuwa majaribio ya mtambo na. 9 kwenye mradi wa kufua umeme wa Julius Nyerere wa Megawati 235 yamekamilika, na hivyo utatua changamoto ya mgao wa umeme nchini.
Kapinga ameyasema hayo hii leo Februari 16, 2024, alipokuwa akijibu swali la nyongeza la Mbunge wa Lupembe, Edwin Sware aliyetaka kujua miradi ya kimkakati ya umeme kama wa Julius Nyerere inaendeleaje na je ratiba ya majaribio imefikia wapi?
Amesema, mradi huo unatekelezwa kwa weledi mkubwa na mwezi Juni, mwaka huu ndio ilipaswa kuwashwa kwa mtambo no 9 , kutokana na jitihada za Serikali unawashwa mwezi huu wa Februari.
Naibu Waziri wa Nishati, Judith Kapinga.
“Nipende kulijulisha Bunge letu tukufu kuwa hadi kufikia Jana tarehe 15 mwezi huu, majaribio ya mtambo huo namba 9 yalifanywa kwa kutembeza mashine hiyo hadi kwenye kiwango chake cha mwisho cha Megawati 235 na majaribio yamefanikiwa kwa kiasi kikibwa” Alisisitiza Kapinga.
Aidha, amesema kwa sasa wataalamu wa mradi wa Julius Nyerere wako kwenye hatua za mwisho za kukamilisha majaribio ikiwemo kuweka ulinzi wa mtambo, ili kuingiza kwenye mpango wa kuzalisha umeme na kuongeza kuwa ratiba ya uzinduzi wa mradi iko pale pale mwezi wa pili mwaka huu na kwamba kwa upande wa mtambo na. 8 wa kuzalisha umeme utaanza kuzalisha mwezi Machi, 2024.
Kuhusu suala la mgao wa umeme, Kapinga amesema hadi kufikia mwezi wa tatu mwaka huu, mgao wa umeme utakuwa umeisha kutokana na kuanza kwa mradi wa kuzalisha umeme ya Julius Nyerere.
